sábado, 12 de agosto de 2017

Makina Fase Ran Iha HNGV La Sufsiente

PARTILHAR
Pasientes sofre moras rins nain 51 lor-loron tenke antrian (hein husi dader to’o lokraik) iha Ospital Nasional Guido Valdares (HNGV) iha kapital Dili, atu fase ran tanba makina fase ran la sufsiente.

Pasiente Candido da Silva, hateten antes ne’e la hein kleur tanba makina sufsiente, maibe agora hein kleur tanba makina hat ne’ebe iha aat (avaria) e makina ida deit mak funsiona, tau espesifiku ba sira ne’ebe sofre hepatitis no pasiente husi makina ne’ebe at ajusta hamutuk sai barak liu tan.

“Ami nia moris depende ba iha makina ne’e, agora ami tenke hein kleur tanba ne’e ami hakarak husu ajuda ba ita bo’ot atu aumenta tan makina ida ne’e,” nia husu bainhira hasoru malu ho Primeiru Ministru Rui Maria de Araújo iha ospital nasional, Bidau, Dili.

Nia preokupa, bainhira pasientes sofre rins ne’ebe halo hela tratamentu iha liur (Indonesia) fila mai, tanba makina ne’e la sufsiente atu atende ema hotu.


Iha fatin hanesan Primeiru Ministru Rui Maria Araújo rekonese nesesidade ba makina haemodealisis bo’ot tanba pasiente barak, maibe sosa makina la’os solusaun ne’ebe efetivu. 

“Problema bo’ot liu ne’e mak ita hotu tenke servisu maka’as atu prevene ema labele to’o faze ida sira nia rins la funsiona ho normal,” nia hateten.

Nia hateten, moras rins nia hun mak moras tensaun aas tanba ne’e populasaun tomak hamutuk ho sistema saude, tenke servisu maka’as atu kombate moras tensaun aas iha Timor –Leste.

Alende ne’e, nia dehan moras fatuk iha rins no diabetes sai mos fator principal ida ba halo ema nia rins la funsiona ho normal no moras fator sira ne’e bele prevene, maibe presiza servisu ne’ebe integradu no politika ne’ebe komprensivu.

Nia dehan, problema la’os orsamentu deit maibe rekursu humanu atu halo operasaun ba makina ida ne’e sei sai mos problema, tanba ne’e presiza iha planu ida ne’ebe diak intermus rekursu no ekipamentus sira iha ospital nasional.

Iha parte seluk, Diretor Jeral HNGV Jose Antonio Gusmão hateten internalmente laiha problema tanba pasientes nafatin fase ran, maibe orario mak tenke aumenta husi dader to’o lokraik.

“Ami la nonok, ami buka hela dalan atu bolu kompania estrangeirus atu hadia urgente,” nia hateten.

Nia mos husu, pasientes atu pasensia hodi hein tanba laiha opsaun seluk, sei esforsu atu hadia makina hirak ne’e.

Nia informa, makina fase ran iha HNGV hamutuk 10, maibe agora iha hat mak at (avaria) no 6 seluk funsiona.

Nia hatutan, total pasiente rins nain 51 mak halo hela fase ran rutina iha HNGV no nain 12 halo fase ran iha Bali, Indonesia tanba makina la sufsiente.

Nia hatutan, maioria pasiente sira fase ran dala rua kada semana, maibe iha balun ne’ebe fase dala tolu kada semana, liu –liu sira ne’ebe identifikasaun foun.

Paulina Quintão | The Dili Weekly
PARTILHAR

Author: verified_user

Publicação luso-timorense sem fins lucrativos

0 comentários: