PLP-Fretilin Sei Namora, Seidauk Kazamentu

DILI – Partidu FRETILIN ho PLP oras nee halo hela diskusaun namanas ba koligasaun, bainhira iha dialogu nee laiha konkordansia entre partidu rua nee maka, sira sei fahe malu iha dalan klaran.

Membru PLP Alin Laek hateten, PLP simu ona FRETILIN nia karta no komesa halao ona dialogu, maibe iha dialogu ida nee sei kolia konaba programa seidauk tama ba iha formasaun Governu, neebe sei namora hela, bainhira karik iha namora laran nee hetan lobi PLP ho Fretilin rezistu para ba halo kazamentu.

Ami sei namora hela, bainhira karik iha namora laran nee hetan lobi ami sei rezistu para ba halo kazamentu, mais ami namora maka domin lahan malu, lamonu  ba malu ami sei fahe malu fali iha tempu badak nia laran,” dehan alin Laek, ba STL, iha UNTL, Dili, Segunda (21/08/2017).

Nia dehan, PLP iha kadeira walu deit, ho kadeira walu nee la atu ba kaer ukun, tanba PLP nia posizaun maka hakarak iha oposizaun, lakoi eleisaun antisipada, no fo lia fuan ba partidu mais votadu para atu halo lobi ba partidu sira seluk para forma Governu.

Iha parte seluk Diretor Ezekutivu Asosiasaun HAK Manuel Monteiro hateten, Governu Foun mai halao sira ninia programa permeiru tuir kontituisaun RDTL artigu seis haruka konaba objetivu estadu nian.

Entretantu Prezidente Partidu PDC Antonio Ximenes hateten, desizaun ida neebe Fretilin halo atu halo koligasaun PLP ho Khunto nee diak teb tebes, tanba partidu rua nee seidauk kaer ukun. 

Carme Ximenes/EST2 | Suara Timor Lorosae