sábado, 12 de agosto de 2017

TL Sei Iha Prosesu Tranzisaun Lingua Aprendizajen

PARTILHAR
Timor–Leste Coalition for Education (TLCE) konsidera Timor –Leste sei iha prosesu tranzisaun hodi introdus lingua aprendizajen iha ensino, tanba iha konstituisaun da republika artigu 13 hatuur ona katak lian oficial mak Tetun no Portugues, maibe sosiedade barak inklui professores la komprende diak lian Portugues.

Koordenador programa TLCE, Matias dos Santos hateten tempu uluk Portugues nia ukun ema lubuk oan ida mak aprende no koalia Portugues, liu –liu sira ne’ebe iha kbi’it finanseiru, enkuantu iha Indonesia nia ukun populasaun la koalia Portugues, koalia deit lian bahasa Indonesia no lian inan to’o ukun rasik aan povu koalia lian Ingles balun, bahasa, e lian Portugues sai fali buat foun ida ba sosiedade.

Nia dehan, uza lian oi-oin introdus sensia no materia iha prosesu aprendizajen ne’e laiha problema, importante professores hatene no estudante sira intende siensia ho diak.


“Ita uza rekursu oi-oin atu lori labarik sira komprende lingua seluk, tanba Portugues la’os ita nia lian maibe hakerek ona iha konstituisaun hanesan lian official ita tenke halo tuir,” nia hateten, iha servisu fatin Kaikoli, Dili.

Nia dehan, iha universitario barak sei uza lian bahasa hodi hanorin estudantes, tanba problema rekursus, liu –liu livrus maioria iha lian bahasa no fasil ba estudante sira komprende siensia.

Nia hatutan, lian sai obstaklu ba kualidade edukasaun, bainhira materia liu–liu livru iha hakerek ho lian Portugues, maibe professores susar atu introdus materia ou siensia ne’e ba estudantes tanba la komprende lian.

“Iha ensino baziku materia balun ba ho Portugues, maibe profesores la hatene Portugues ida ne’e mak problema lingua ne’e prejudika ba edukasaun,” nia preokupa.

Nia sujere, ba governu atu kontinua hasa’e kapasidade profesores iha lingua no produs livru iha lian official rua ne’e hodi bele fasilita professores ho diak liu tan iha prosesu aprendizajen.

Entretantu, Diretor Ensino Baziku Komunidade Venilale Julio Ximenes hateten lingua principal ne’ebe sira uza iha prosesu aprendizajen mak lian Portugues no Tetun, maibe iha kurikulum foun aumenta tan lingua materna.

Nia dehan, durante prosesua aprendizajen sira uza lian materna rua hanesan Makasa’e no Mediki hodi introdus materia ba alunus sira.

“Problema oituan tanba lingua materna ne’e sira (estudante) pronto atu koalia, maibe atu ba fali Portugues no Tetun ne’e difisil,” nia hateten. 

Iha parte seluk, Diretor Jeral e Kooperasaun Ministerio Edukasaun Antonino Pires rekonese universidade balun sei uza lian bahasa atu hanorin estudante, maibe governu mantein ho desizaun tuir lei.

“Lei baze da edukasaun hatuur ona, katak lian ba prosesu aprendizajen iha Timor ne’e iha rua deit, ne’e klaru laiha tan kompromi no negosiasaun,” nia hateten.

Nia hateten, governu esforsu atu fo formasaun diak liu tan ba professores no dezenvolve diak liu tan livru sira hodi fasilita prosesu aprendizajen ne’ebe diak no kualidade.

Paulina Quintão | The Dili Weekly
PARTILHAR

Author: verified_user

Publicação luso-timorense sem fins lucrativos

0 comentários: