Tuku Ema, Polísia Tiru Gás Lakrimojéneu ba MUTL

DILI, (TATOLI) - Asaun demonstrasaun Movimentu Estudante Universitáriu Timor-Leste (MUTL), ohin, Segunda (21/08) sai dezorganizadu tiha nune’e, Polísia Nasionál Timor-Leste (PNTL) lansa tiru gas lakrimojéneu hodi evita mosu anarkizmu.

Polísia sira tiru gas lakrimojéneu tanba, membru MUTL ida tuku funsionáriu parlamentu nasionál, João Correia ne’ebé hakbesik an ba Massa MUTL ne’ebé konsentra entre edifísiu Universidade Nasionál Timor-Leste nia oin ho Parlamentu Nasionál nia oin.

Haree ba asaun hosi Massa MUTL, Polísia sira ne’ebé halo seguransa ba demonstrasaun lansa kedan tiru gas  lakrimojéneu hodi hafahe tiha massa atu bele salva vítima ne’ebé mak estudante sira tuku.

Biar nune’e, Estudante Universidade Nacional Timor Lorosa’e (UNTL) lamenta asaun PNTL (Polícia Nacional Timor-Leste) hodi tiru tama gás lakrimojéneu (gas air mata) ba sala laran bainhira prosesu aprendizajen la’o hela.

João Manuel, nu’udar estudante Fakuldade Direitu,  informa katak estudante, dosente inklui mós funsionáriu UNTL balun kona mós gás lakrimojéneu, iha momentu PNTL halo atuasaun ne’e.

“Ami halo prosesu aprendizajen, ami jerasaun kontinuador. Imi haruka dehan jerasaun foun tenke estuda, ami estuda hela lori gás air mata mai sobu ami,” João lamenta.

Hodi konsidera katak, polísia tiru gás lakrimojéneu ba universidade, bainhira estudante sira hala’o hela prosesu aprendizajen ne’e úniku ida iha mundu no foin mak akontese iha Timor-Leste.

“Ha’u kestiona, sira-nia profisionalizmu mak la iha ka oinsá ?,” estudante ne’e kestiona. No konta katak, manifestasaun ne’e rasik Fakuldade Direitu la envolve. Ami hamriik iha nee, baibain. Loroloron ami hamriik iha ne’e tanba ami-nia kampus, ami rekreiu ami hamriik iha ne’e. Se sira provokadór ne’e, sira iha estrada ne’ebá mak provokadór ikus mai ami mak vítima.”

Iha fatin hanesan Ministru Interiór Longuinhos Monteiro responde katak, PNTL tiru tan konsidera iha kazu ruma ne’ebé mak laloos.

“Polísia iha ninia meius atu hapara,” Longuinhos defende.

Entretantu iha akontesimentu ne’e provisoriamente karreta rua mak hetan ona estragu makas, entre karreta rua ne’e ida hosi instituisaun RTL, ep no ida seluk karreta estadu.

Jornalista: Rafy Belo | Editór: Manuel Pinto