Hasae Produsaun Kafe Tenke Planu Dezenvovimentu

DILI - Kafe Timor naran morin iha mundu tanba nee, Ministru Agrikultura e Peskas (MAP) hamutuk ho parseiru dezenvolvimentu iha rai laran, realiza seminar ida, konaba Planu dezenvolvimentu Nasional setor kafe iha TL.

Tuir Ministru Estadu koordenador Asuntu Ekonomia e Ministru Agrikultura e Peska (MECAE), Estanaislau da Silva katak, TL nia kafe nee morin iha mundu tanba nee, tenke aprezenta planu setoral ida atu dezenvolve kafe Timor ba oin.

“Hau hanoin kafe Timor hanesan kultura importante ida ba TL, no kultura ida nebee maka sei la hotu tanba kafe nee renovabel, tan nee atu dezenvolve kafe ho diak maka, tenke iha planu setoral neebe diak hodi hatene klaru saida maka sei halo, no osan hira maka presiza,” informa MECAE Estanislau da Silva ba Jornalista Kinta (14/09/2017) iha nia knar fatin MAP Comoro.

Nia mos hatuir tan katak, kafe hanesan produtu TL neebe sai numeru hodi halo exportasaun ba rai liur.Tanba nee, knar governu nian maka atu fo apoiu no halo asistensia ba agrikultores oinsa atu servisu makaas liu tan iha baze hodi hasae produsaun kafe Timor iha rai laran.

Tuir Ministru nee katak, kafe Timor hanesan kafe neebe organiku tebes no halo mos TL nia naran konesidu iha mundu, tanba nee liu husi workshopida ohin bele halo deskusaun klean liu tan. Nohamosu hanoin neebe diak atu nunee bele dezenvolve kafe Timor hodi hasae produsaun iha rai laran.

Iha fatin hanesan Diretur Kafe Timor, Evangelio Monteiro hateten, atu hasae kuantidade produsaun kafe iha rai laran maka, governu liu MAP tenke fo apoiu makaas agrikultores iha baze.Tanba haree ba produsaun kafe iha rai laran tinan ida kuantidade tun, tinan ida sae, tanba nee governu tenke eduka agrikultor sira iha baze.

“Hau hanoin atu hasae produsaun kafe iha rai laran maka, asosiasaun, governu, nomos doadores sira neebe maka durante nee fo ona apoiu, tenke halo diskusaun hamutuk konaba planu ba oin nee atu halo saida, tanba nee ohin ita partisipa hotu iha seminar ida nee atu troka hanoin ba malu oinsa atu dezenvolve setor kafe TL nee ho diak,” informa nia.

Nunee mos Reitor East Timor Coffee institute (ETCI) Lucio Marcal Gomes hateten, sorumutu nee importante tebes tanba, bele fo hanoin ba malu konaba saida maka ita atu iha aban bain rua, tanba kafe Timor ninia kualidade diak no naran morin iha mundu, tan nee ita tenke dezenvolve didiak atu nunee kafe nia morin nafan iha mundu. 

Madalena Horta | Suara Timor Lorosae