terça-feira, 5 de setembro de 2017

“PLP Harii La’ós atu Assume Kargu”

DILI, (TATOLI) – Deputadu hosi Partidu Libertasaun Populár (PLP) iha lejislatura da-haat, Fidelis Magalhães haktuir, PLP harii la’ós atu assume kargu maibé defende valór no prinsípiu partidu nian atu bele avansa dezenvolvimentu ne’ebé di’ak ba nasaun no povu.

“PLP harii la’ós atu assume kargu, PLP hola pozisaun tanba la-konkorda kuandu iha koligasaun maibé partidu ida mak okupa hotu poder iha órgaun soberania hanesan lejislativu, judisiáriu, ezekutivu no Prezidente Repúblika”, dehan Fidelis iha Parlamentu Nasionál hafoin abertura plenária dahuluk ba lejislatura da-haat, tersa (5/9).

Nia afirma, kuandu halo koligasaun presiza haree aliserse, definisaun tenke klaru, presiza mós defende programa partidu nian, defende valór no prinsípiu partidu nian atu bele avansa ba dezenvolvimentu ne’ebé di’ak ba nasaun no povu.

Partidu PLP la konkorda hodi fasilita partidu ida de’it bele ka’er hotu órgaun soberania, polítika ne’e tenke iha entendimentu ba programa, kuandu iha koligasaun signifika partidu PLP nia ema mós tenke asume kargu ruma iha órgaun soberania.

“Partidu PLP la’ós sai hosi koligasaun no nunka tama iha koligasaun tanba ne’e mak ami laiha akordu ida kona-ba kompozisaun meza”, afirma nia.

Hatutan, koligasaun tenke iha definisaun loloos, laran momos ou la’e, nia arte ne’e saida, implikasaun saida.

“Ohin loron ami hamriik la’o no ami sei deside tuir ami nia eskollamentu rasik iha Parlamentu Nasionál nu’udar opozisaun ne’ebé konstrutivu no dinámiku”.

Jornalista: Zezito Silva | Editora: Rita Almeida

Sem comentários: