domingo, 15 de outubro de 2017

Deputadu sira ASEAN nian kondena perseguisaun ba opozisaun iha Kamboja

Deputadu sira hosi Asosiasaun hosi Nasaun sira Sudeste Aziátiku (ASEAN) nian iha loron-sesta ne'e kondena tentativa hosi Governu Kamboja hodi halakon opozisaun polítika hosi nasaun antes eleisaun jeral iha tinan oinmai.

Governu ne'ebé lidera hosi primeiru-ministru Hun Sen husu ona ba Supremu Tribunal, iha semana liubá, hodi sobu Partidu Resgate Nasional Kamboja nian (CNRP), forsa opozisaun prinsipal, tanba deskonfia envolvidu iha krimi ida traisaun nian.

"Dezenvolvimentu foun sira ne'e ameasa fortalese poder efetivu hosi partidu ida iha ámbitu legal no nega ba ema kambojanu sira nia direitu fundamental hodi hili sira nia líder tuir dalan livre", afirma hosi malaiu Charles Santiago, ne'ebé prezidi Parlamentar sira hosi ASEAN nian ba Direitu Ema nian (APHR, iha sigla lian inglés).

Kem Sokha, atual líder CNRP nian, ne'ebé hanesan prezu dezde fulan-Setembru, hetan akuzasaun halo konspirasaun ho poder estranjeiru ida, iha referénsia ba Estadus Unidus, hasoru Governu hosi primeiru-ministru kambojanu, bele hetan kastigu tinan 15 no 30 iha kadeia bainhira hetan kondenasaun.


Prezidente APHR nian konsidera denúnsia ne'e hanesan farsa ida ne'ebé "hatudu intensaun sira hosi Governu hodi halakon opozisaun tuir dalan oioin" no afeta diretamente ba kredibilidade hosi eleisaun sira tuirmai.

"Hanesan insultu ida ba 44% hosi ema kabojanu sira ne'ebé maka apoia CNRP iha tinan 2013 no ne'ebé maka merese hetan reprezentasaun hosi membru eleitu sira", subliña hosi responsável ne'e.

Primeiru-ministru kambojanu, Hun Sen, ameasa tiha ona iha fulan liubá hodi sobu CNRP bainhira kontinua apoia Kem Sokha. "Bainhira partidu polítiku defende traidor signifika katak sira mós hanesan traidor no laiha fatin hodi partisipa iha prosesu demokrátiku Kamboja nian", deklara hosi xefe Estadu.

Hun Sen, ne'ebé okupa kargu primeiru-ministru dezde 1985, valida fali mandatu iha tinan 2013 hafoin manán, ho marjen ki'ik ida, eleisaun sira ne'ebé opozisaun hatete katak iha fraude.

"Dezde 2013, Hun Sen sobu ona instituisaun demokrátiku sira ne'ebé fraku hosi Kamboja. (…) Iha uzu klaru hosi sistema legal hodi sobu impériu lei nian", afirma hosi kongresista filipinu Tom Vilarrin, membru hosi APHR ne'ebé insisti aumenta presaun hosi komunidade internasinal hodi restaura demokrasia iha nasaun aziátiku ne'e.

Primeiru-ministru kambojanu hamosu nafatin presaun ida hasoru nia krítiku sira, meiu komunikasaun ho opozitor polítiku sira, liuliu hafoin lakon tiha pozisaun sira iha eleisaun lokal foin lalais ne'e no menus tinan ida antes halo eleisaun jeral sira iha 29 Jullu 2018, ne'ebé ba dala uluk nia partidu bele la sai hanesan vensedor loloos.

Hun Sen hatete ona, iha fulan hirak ikus ne'e, iha okaziaun oioin, ba posibilidade hosi funu sivil ida bainhira nia partidu lakon poder iha eleisaun sira ne'ebé previstu ba fulan-Jullu tinan oinmai.

SAPO TL ho Lusa

Sem comentários: