Mari Alkatiri hatudu solidariedade ho vítima sira inséndiu nian iha Portugal

Primeiru-ministru timoroan, Mari Alkatiri, husik iha loron-tersa ne'e mensajen ida solidariedade nian ba Portugal no ba portugés sira tanba "trajédia mortal" ne'ebé maka nasaun hasoru hela tanba inséndiu sira iha findesemana ne'e.

"Ha'u hakarak hatudu ami nia solidariedade ba trajédia mortal ne'ebé dala ida tan akontese iha Portugal", nia hatete iha dikursu ida ba autoridade prinsipal timoroan sira nian iha Palásiu Prezidensial iha Díli.

"Númeru hosi vítima sira no hosi área sira ne'ebé hetan sunu to'o agora halo sidadaun timoroan sira hakarak hatene no, maski dook tuir jeografia ne'ebé maka haketak ita, ha'u hakarak husik klaru katak povu Portugal nian agora daudaun, liu duké antes, iha ami nia orasaun sira", nia afirma.

Alkatiri ko'alia iha serimónia tomada pose ba membru ezekutivu na'in lima, ne'ebé hala'o ona funsaun sira dezde loron 15 Setembru liubá.

Iha loron-segunda, bainhira vizita Madeira, antigu prezidente Timor-Leste nian, Xanana Gusmão, hatete katak rekomenda ona ba Governu hosi nia nasaun hodi estuda dalan ida hodi ajuda fali Portugal hasoru inséndiu maka'as sira ne'e.

"Hanesan triste ida ba ema tomak. Ha'u bele hatete de'it katak ha'u rekomenda ona ba primeiru-ministru atual, hodi haree ida ne'e. Imi komprende katak dalaruma problema maka la'ós kuantidade osan nian maibé jestu solidariedade nian", Xanana Gusmão hatete.

Iha fulan-Juñu 2017, Governu Timor-Leste fó ona euro millaun 1,3 ba ajuda humanitáriu ba vítima sira hosi inséndiu sira iha Pedrógão Grande, no agora Xanana Gusmão ko'alia ona ho primeiru-minitru timoroan iha asuntu hanesan.

"Ha'u hatete ona ba nia: Labele haluha dalan ida hodi tulun Portugal", nia hatete no esplika katak, apoiu ruma bele akontese de'it hafoin aprova Programa Governu nian, ne'ebé iha semana ne'e hahú ona debate.

Inséndiu atus resin ne'ebé akontese iha loron-domingu, loron ne'ebé aat liu hosi inséndiu iha tinan ne'e tuir autoridade portugés sira, halo ona pelumenus ema na'in 27 mate no na'in sanulu resin kanek, aleinde tenki obriga halo evakuasaun, fó fali hela fatin ba populasaun sira no taka tránzitu iha estrada sanulu resin.

Primeiru-ministru portugés, António Costa, fó sai ona katak Governu asina ona despaxu ida hosi kalamidade públiku, abranje distritu tomak hosi norte to'o Tejo, hodi aumenta mobilizasaun hosi meiu sira, liuliu disponibilidade hosi bombeiru sira iha kombate hasoru inséndiu sira, no dekreta ona lutu nasional loron tolu hahú iha loron-tersa to'o loron-kinta.

Portugal halo ona asaun Mekanizmu Europeu ba Protesaun Sivil no protokolu ho Maroko, relasionadu ho utilizasaun hosi meiu aéreu sira.

Ne'e hanesan situasaun daruak ne'ebé aat liu hosi inséndiu sira ho vítima mortal iha tinan ne'e, hafoin akontesimentu iha Pedrógão Grande, inséndiu ida ne'ebé hahú alastra ba munisípiu sira seluk no ne'ebé halo ona ema na'in 64 mate no na'in 250 resin kanek.

SAPO TL ho Lusa