quarta-feira, 18 de outubro de 2017

Mari Alkatiri rekuza versaun foun hosi programa governu nian bainhira la liu

Primeiru-ministru timoroan hatete iha loron-tersa ne'e katak bainhira opozisaun maioritáriu aprezenta proposta rejeisaun ida ba programa Governu nian, ezekutivu sei la halo versaun daruak ida no governante seluk ida maka aprezenta testu ne'e iha debate daruak ida.

"Governu sei la halo versaun daruak hosi programa. Bainhira barak ami fila ho programa hanesan, maski nune'e, membru seluk ida hosi Governu maka aprezenta. Ha'u ba dala ida de'it ba parlamentu. Ho programa hanesan laiha justifikasaun aprezenta nafatin hosi ema ida hanesan", Mari Alkatiri hatete iha deklarasaun sira ba Lusa.

Xefe Governu hatete nune'e kona-ba posibilidade katak bainhira opozisaun manán, iha loron-kuarta ne'e, ho proposta rejeisaun ida hasoru programa Governu nian ne'ebé debate hela iha plenáriu hahú loron-segunda ne'e. Debate ajenda ona hodi akontese to'o loron-sesta.

Fonte sira hosi partidu boot opozisaun nian, Congresso Nacional da Reconstrução Timorense (CNRT), admiti ona ba Lusa katak proposta ida bele aprezenta ona iha loron-kuarta, tanba testu ne'e diskuti ona ho forsa opozisaun sira seluk ne'ebé kontrola fatin 35 hosi fatin 65 iha Parlamentu Nasional.


"Ha'u la preokupadu ho ida-ne'e. Bainhira (proposta) avansa entaun di'ak. Bainhira la avansa, di'ak mós", Alkatiri hatete bainhira hakotu serimónia tomada pose ba membru na'in lima foun Governu nian.

Hahú loron-segunda maka ezekutivu minoritáriu, apoia hosi deputadu sira hosi Frente Revolucionária do Timor-Leste Independente (Fretilin) no hosi Partidu Demokrátiku (PD) defende hela programa Governu nian iha Parlamentu Nasional, ne'ebé sira kontrola fatin 30 hosi fatin 65.

Opozisaun - forma hosi CNRT, Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO) - harii Aliansa Maioria Parlamentar (AMP) ida ne'ebé oferese ona hanesan alternativu ba Governu bainhira programa ne'e la liu.

Tanba ne'e tenki aprezenta proposta rejeisaun rua hosi dokumentu.

Bainhira avansa, proposta rejeisaun dahuluk tenki aprezenta to'o loron-sesta, loron ne'ebé karik sei hakotu debate kona-ba Programa Governu nian no tenki apoia hosi maioria deputadu sira nian.

Iha kazu ne'e Governu sei iha to'o loron 30 hodi halo fali programa foun ne'ebé sei hetan fali debate durante máximu loron lima iha Parlamentu Nasional. Governu sei monu bainhira hetan fali proposta rejeisaun nian.

Bainhira Governu monu, Prezidente Repúblika, Francisco Guterres Lu-Olo, tenki desidi atu konvida AMP hodi harii Governu ka hili eleisaun antesipadu ne'ebé bele konvoka hahú de'it hosi loron 22 Janeiru, bainhira kumpri fulan neen hosi eleisaun ba atual parlamentu.

Debate semana ne'e hala'o lahó prezensa iha Timor-Leste hosi prezidente CNRT nian, Xanana Gusmão, ne'ebé durante eleisaun garanti ona katak partidu sei la aseita "proposta hosi ema ida", no sei la konvida "partidu ruma hodi harii koligasaun sira, tanba lakohi partisipa iha Governu".

Aleinde ne'e, nia deklara ona katak sei la repete akontesimentu tinan 2007 nian, bainhira CNRT sai hanesan partidu daruak ne'ebé hetan liu votu hafoin Fretilin, maibé, "hodi rezolve krizi ne'ebé nasaun hasoru iha momentu ne'ebá", hili hodi harii aliansa ida maioria parlamentar nian.

Maski Xanana Gusmão seidauk ko'alia ba públiku kona-ba asuntu ne'e, nia partidu afirma ona katak AMP foun ne'e iha autorizasaun hosi nia.

Iha deklarasaun sira iha Funchal, Xanana Gusmão la klarifika kestaun, maibé hatete de'it katak partidu hakarak "hetan esperiénsia" hanesan opozisaun.

"Hafoin rezultadu sira hosi eleisaun sira, ami [CNRT] halo ona konferénsia nasional ida no ami desidi ona kona-ba asaun ne'ebé ami sei halo. No ami desidi katak ami sei sai hanesan partidu opozisaun ida hodi ami iha mós tempu sufisiente ida hodi implementa programa ida formasaun hosi kuadru sira partidu nian, hodi iha preparasaun no hetan esperiénsia hanesan opozisaun", afirma hosi Xanana Gusmão ne'ebé hala'o hela vizita iha illa Madeira.

"Ami mosu iha tinan 2006, iha krizi, no ami governa kedas ba períudu konsekutivu rua. No agora, tanba ami lakon, ami hatete nune'e: ami sei hanoin, ami sei hadi'a kapasidade hodi manán bainhira ami kontinua partisipa iha jogu demokrasia ne'e", nia subliña.

SAPO TL ho Lusa

Sem comentários: