terça-feira, 17 de outubro de 2017

Portugal: Vítima mortal hosi inséndiu sira aumenta ba na'in 27

Pelumenus ema na'in 31 mate ona iha inséndiu hamutuk 500 resin ne'ebé maka akontese iha loron-domingu ne'e, hanesan loron aat liu iha tinan ne'e iha inséndiu sira, fó sai hosi Autoridade Nasional hosi Protesaun Sivil (ANPC) Portugal nian.

Tuir adjunta hosi operasaun sira ANPC, Patrícia Gaspar, ne'ebé ko'alia iha ‘briefing’ loron-segunda dadeer katak vítima mortal sira ne'e rejistu iha distritu sira Guarda, Coimbra, Viseu ho Castelo Branco.

Patrícia Gaspar hatete mós katak iha loron-domingu rejista ona inséndiu hamutuk 500 resin no, hahú tuku 00:00 (oras lokal) iha loron-segunda ne'e, autoridade sira rejista ona hamutuk 110.

Tuir Jaime Marta Soares, hosi Liga Bombeiru Portugés sira nian, ne'ebé ko'alia ba Lusa katak iha distritu sira Coimbra rejista ona vítima mortal iha Oliveira do Hospital (na'in lima), São Martinho da Cortiça (na'in ida), Penacova (na'in rua), Arganil (na'in ida) ho Tábua (na'in rua).

Iha Viseu rejista ona vítima mortal sira iha Santa Comba Dão (na'in rua), Nelas (na'in ida), Vouzela (na'in haat), Tondela (na'in tolu), Carregal do Sal (na'in ida).

Iha Castelo Branco rejista ona ema na'in ida mate iha São Jorge da Beira no iha Guarda iha vítima mortal na'in ida.


Tuir Jaime Marta Soares, iha mós vítima mortal na'in ida iha estrada A25 no na'in rua iha Itineráriu Prinsipal (IP)3.


Inséndiu atus resin ne'ebé akontese iha loron-domingu, loron ne'ebé aat liu hosi inséndiu iha tinan ne'e tuir autoridade portugés sira, halo ona pelumenus ema na'in 27 mate no na'in sanulu resin kanek, aleinde tenki obriga halo evakuasaun, fó fali hela fatin ba populasaun sira no taka tránzitu iha estrada sanulu resin.

Primeiru-ministru portugés, António Costa, fó sai ona katak Governu asina ona despaxu ida hosi kalamidade públiku, abranje distritu tomak hosi norte to'o Tejo, hodi aumenta mobilizasaun hosi meiu sira, liuliu disponibilidade hosi bombeiru sira iha kombate hasoru inséndiu sira.

Portugal halo ona asaun Mekanizmu Europeu ba Protesaun Sivil no protokolu ho Maroko, relasionadu ho utilizasaun hosi meiu aéreu sira.

Ne'e hanesan situasaun daruak ne'ebé aat liu hosi inséndiu sira ho vítima mortal iha tinan ne'e, hafoin akontesimentu iha Pedrógão Grande, inséndiu ida ne'ebé hahú alastra ba munisípiu sira seluk no ne'ebé halo ona ema na'in 64 mate no na'in 200 resin kanek.

SAPO TL ho Lusa

Sem comentários: