Governu Tenke Legaliza Fali Grupu Arte Marsial

Loron 2 Novembru Finadu (loron Matebian) loron ne’ebé importante ba Timor-Leste, iha momentu ne’ebé ema hotu-hotu iha nasaun ne’e hanoin hikas fila fali nia ema sira ne’ebé mate ona. Maibé iha tinan ida ne’e loron sagradu hafoer ho insidente violensia hosi joventude Grupu Arte Marsiais (GAM). Aktu violensia ne’e rezulta fakar ran sai tristeza tebes ne’e la’ós sai hanesan faktus ida para halo fallansu governu dahuluk nia polítika kona-bá resolve problema GAM. Governu bandu ona GAM tolu hanesan (Kera Sakti, PSHT, ho KORK) iha tinan 2013, maibé atividade hosi gorupu GAM ne’e kontinua nafatin. Fundasaun Mahein (FM) rekomenda governu atu legaliza fali GAM ne’ebé taka tiha ona no tau regra atu kontrola atividade Grupu Arte Marsial ho diak.

Insidente violensia akontese naklekar los iha teritoria Timor-Leste durante feriadu iha Novembru nian. Ema ida mate iha Balibo, Maliana, konfrontasaun entre GAM iha loron 2 Novembru. Iha loron 3 Novembru 2017, grupu joventude balun halo atake ba Padre ida iha Postu Administrativa Zumalai, Cova Lima. Iha biban hanesan mos iha Munisipiu Lautem, feto ida hetan hana ho rama ambon iha loron 5 Novembru 2017. Nune’e mos iha Suku Gariuai, Baucau, joventude ida hosi GAM PSHT hetan sona hosi membru GAM Kera Sakti iha loron finadu. Ema ida ne’ebé involve ida violensia ida ne’e tiun sona ho diman ba fali nia subrinu rasik, sorte oituan vítima lamate maibé kanek todan. Iha momentu feriadu ne’eba GAM sira ne’e hateka malu iha suku no iha aldeia sira ne’ebé halo ema paniku no sempre akontense kada tinan.

Iha loron 8 Novembru kalan, Polisia Nasional Timor-Leste (PNTL) halo kapturasaun ba membru GAM “77” hamutuk nain 139 iha serimonia ritual iha area Taibesi, Dili. Kaptruasaun ida ne’e hanesan susesu boot autoridade sira, nune’e ida ne’e kapturasaun hosi PNTL dahuluk nian ba membru GAM boot depois governu bandu gorupu hira ne’e iha tinan 2013, ne’e lidun ida. Iha lidun seluk, fallansu autoridade seguransa durante tinan hat nia laran hamosu ona perguntas barak kona-bá sira nia profesionalismu atu deteta GAM sira. Deskonfiansa naklekar los ona iha Timor-Leste katak membru polisia ho militar involve iha GAM ne’e rasik. Talves GAM hirak ne’e inflitra iha forsa seguransa, no balun esplika katak tamba sa mak tenke bandu sira ho faktus laefektivu.

Dala barak ona Komandu Polisia ho Militar hasai estetmentu ho agresivamente bainhira akontesementu kona-bá violensia GAM, maibe sei kontinua halo operasaun no laiha baze legal ida. Kada tinan membru GAM hakur fronteira Timor-Leste ho Indonezia illegalmente atu ba test ka sae level kona-bá sira nia kapasidade téknika nian. Ho GAM nia presenza ne’e hamosu ona vítima barak iha Timor-Leste, tamba lakon vida ka mate, no estragus, sunu uma, harahun kareta no propria públiku sira seluk, nune’e mos hamosu situasaun tauk iha fatin barak.

Nune’e mos, GAM hirak ne’e harahun hahalok moruk ba unidade iha sosedade Timor oan sira. hetok sira bele sai inimigu bainhira iha membru familia balun tuir grupu gang seluk. Violensia iha suku Gariuai, Baucau, sai exemplu hosi impaktu destrusaun ba relasaun sosial ne’ebé báziku liu. Hanoin katak ameasa ida ne’e seriu tebtebes mak, husu governu tenke responde ho polítika no nia implementasaun ida ne’ebé efektivu liu.

Ho nune’e, FM rekomenda ba governu atu legaliza fali Grupu Arte Marsial (GAM) nune’e sira nia atividade iha baze legal hodi governu bele halao kontrolu ida ne’ebé efektivu. Legalizasaun ba GAM ho kriteria katak kada GAM tenke ba halo rejistu iha Ministériu Justisa dirasaun Notariadu nian. Notariadu hosi Ministeriu Justisa sei sertifika atu bele habiban sira nia atividade ho legalmente. Nune’e mos wainihira GAM loke sira nia ranting ka canbang GAM tenke halo tan registu. Depois ida ne’e Ministériu Justisa sei husu atu GAM sira tenke iha kartaun Identidade Organizasaun nian ho numeiru.

Depois ida ne’e numeiru kartaun ID sei hatama ba Data Base. Prosesu ida ne’e sei halo grupu sira ne’e sentralizadu no sei fasil kontrola no laiha predisaun. Depois governu bele kontrola GAM nia lider hosi nasional to lokal. No ikus liu bele hatama grupu organizasaun sira ne’e ba argaun legulador sira mak sei habiban governu atu fasil identifika GAM nia lider sira no bele husu aktu responsabilidade ba asaun ruma karik akontese iha sira nia area.

Bainhira GAM hetan ona legalizasaun, Governu tenke kria ona kompetisaun kona-bá GAM nian hosi nasional ho regional atu bele dezemvolve sira nia talentu ho konstrutiva energia, ho agresivamente. Ho ida ne’e mak kompetisaun bele atrai turista sira hodi suporta dezemvolvementu iha area turismu hosi domestiku to internasional. Ida ne’e bele ajuda Timor-Leste atinji objeitivu ida ne’ebé dezemvolve an no bele atraktivu. Kompetisaun mos sei obrigatoriamente atu membru GAM hatudu kartaun identidade organizasaun nian, ho nune’e governu bele mos insentiva GAM atu bele hakruk ba regra governu nian kona-bá registu.

Dala ruma ema ladun komprende formalmente GAM ne’ebé hakanek ona komunidade iha Timor Leste. Maibé atu bandu ka taka deit organizasaun sira ne’e maka susar atu kontrola diak. FM fiar katak legalizasaun ba GAM sai hanesan metodu ida ne’ebé pritinente liu atu bele kontrolu no halo sira benefisia liu ba estadu.

Fundasaun Mahein | ho espesial atensaun Eufemia de Jesus

Foto: Internet