quarta-feira, 15 de novembro de 2017

Lu-Olo la simu hamutuk líder polítiku sira, sei simu ikus Xanana Gusmão

Prezidente timoroan la simu hamutuk, iha loron-kuarta ne'e, líder sira hosi partidu dahuluk no datoluk timoroan nian, Mari Alkatiri ho Taur Matan Ruak, hafoin ne'e maka sei iha enkontru ida ho Xanana Gusmão, prezidente hosi partidu daruak, fó sai hosi Prezidénsia iha loron-tersa ne'e. 

Enkontru "ho líder istóriku sira" antes fó sai katak sei halo reuniaun ida ho ema na'in haat, entre Prezidente Repúblika, Francisco Guterres Lu-Olo,no ho líder sira hosi partidu boot tolu timoroan nian, Frente Revolucionária do Timor-Leste Independente (Fretilin), Congresso Nacional da Reconstrução Timorense (CNRT) ho Partidu Libertasaun Popular (PLP).

Iha komunikadu ne'ebé fó sai hosi Prezidénsia iha loron-tersa ne'e katak Lu-Olo simu Mari Alkatiri, sekretáriu-jeral Fretilin nian iha tuku 09:00 loron-kuarta no prezidente PLP nian, Taur Matan Ruak, iha tuku 15:00 (oras lokal).


Xanana Gusmão, ne'ebé iha estranjeiru hahú hosi loron 11 Setembru no seidauk iha loron loloos hodi fila ba nasaun, labele partisipa tanba agora daudaun iha Xina no iha loron-kuarta ne'e to'o iha Singapura hodi halo fali negosiasaun foun iha loron-kinta ho Austrália kona-ba fronteira tasi nian.

"Prezidente Repúblika halo hela diálogu ida ho líder istóriku sira hodi hetan solusaun ba problema polítiku ne'ebé mosu hafoin partidu opozisaun sira rejeita tiha programa hosi Governu konstitusional VII iha Parlamentu Nasional", refere hosi komunikadu.

Enkontru ho Xanana Gusmão "adia ona tanba Xanana Gusmão iha estranjeiru hodi trata asuntu sira relasionadu ho definisaun fronteira tasi nian entre Timor-Leste ho Austrália", refere iha komunikadu.

Governu minoritáriu, apoia hosi deputadu na'in 23 hosi Fretilin no na'in hitu hosi Partidu Demokrátiku (PD), hasoru proposta rejeisaun ida ba nia programa ne'ebé aprova hosi bloku opozisaun nian, ne'ebé integra CNRT, PLP ho Kmanek Haburas Unidade Nacional Timor Oan (KHUNTO) - entre sira iha deputadu hamutuk na'in 35.

Ezekutivu prepara hela programa foun ida Governu nian, hodi aprezenta to'o tinan ne'e nia rohan, no entrega ona Orsamentu Retifikativu ba tinan 2017 iha Parlamentu Nasional no husu atu bele hanesan prosesu urjente.

Opozisaun maioritáriu iha parlamentu timoroan kritika ona justifikasaun sira ne'ebé Governu hato'o ba preparasaun hosi Orsamentu Retifikativu ida ba tinan 2017, hodi konsidera katak sei sufisiente fundu sira iha kofre públiku to'o tinan ne'e nia rohan no mós kona-ba aprezentasaun ida antes lori programa foun ba deputadu sira.

Bainhira programa Governu nian rejeita fali, exekutivu sei monu no Prezidente Repúblika tenki desidi solusaun governativu ida iha senáriu parlamentu atual nia laran ka halo eleisaun foun sira.

Hafoin eleisaun sira, CNRT, ne'ebé hanesan partidu daruak ne'ebé hetan liu votu, fó sai katak hakarak sai hanesan opozisaun, maibé agora aprova ona inísiu hosi konversasaun formal sira hodi harii Aliansa Maioria Parlamentar (AMP) ida ne'ebé hakarak sai hanesan alternativu hosi Governu Fretilin nian.

SAPO TL ho Lusa

Sem comentários: