Mugabe simu enviadu sira SADC nian, líder opozisaun husu ba nia atu rezigna

Prezidente Zimbabué nian hasoru malu iha sede Prezidénsia nian, iha Harare, ho reprezentante espesial sira hosi Komunidade Dezenvolvimentu Áfrika Austral (SADC) nian, hafoin intervensaun militar, hatete hosi porta-vós ida hosi Governu súl-afrikanu nian.

Tuir Clayson Monyela, porta-vós hosi Ministériu Negósiu Estranjeiru, ne'ebé haktuir hosi ajénsia France-Presse, katak misaun hosi SADC inklui ministru súl-afrikanu sira hosi Defeza no Seguransa Nasional nian, ne'ebé haruka hosi prezidente Jacob Zuma, ne'ebé prezidi agora daudaun organizasaun sub-rejional hosi Áfrika Austral.

Monyela hatete katak enkontru hala'o iha sede Prezidénsia zimbabueanu, iha Harare, konfirma indikasaun sira ne'ebé avansa hosi sasin sira ba komunikasaun sosial lokal ne'ebé hatete katak karavana prezidensial ida, ne'ebé akompaña hosi helikópteru ida, tuir hela ho destinu ba palásiu prezidensial.

Tuir fonte sira televizaun súl-afrikanu SABC nian, konversa entre Mugabe, ne'ebé durante oras 24 resin iha hela prizaun domisiliáriu, ho reprezentante espesial sira hosi SADC halo hodi hetan solusaun ida ba krizi polítiku-militar ne'ebé bele hakotu rejimi tinan 37 ne'e.

Iha tempu hanesan, líder hosi opozisaun zimbabueanu, Morgan Tsvangirai, hanesan mós prezidente hosi Movimentu ba Mudansa Demokrátiku sira (MMD), defende ona katak Mugabe tenki rezigna aan hosi prezidénsia Zimbabué nian, kargu ne'ebé nia okupa dezde nasaun hetan independénsia iha tinan 1980.

Iha enkontru ida ho jornalista sira, iha Harare, Tsvangirai afirma ona katak presiza halo negosiasaun ba "mekanizmu tranzitóriu inkluzivu!" hodi hametin funsaun governativu sira, nune'e mós ba reforma oioin antes halo eleisaun sira iha tinan 2018.

Nia hatutan katak tenki harii plataforma ida pós-eleitoral hodi garanti estabilidade iha nasaun no atu, bloku rejional SADC no mós Uniaun Afrikanu (UA) tenki halo parte iha paktu ne'e.

Tsvangirai garanti mós katak nia la simu kontaktu ruma hodi halo parte iha "mekanizmu ida tranzisaun" (governu) nian maibé nia admiti katak karik partidu sei partisipa bainhira akontese.

Entre tinan 2009 ho 2013, Morgan Tsvangirai prezidi Zimbabué hamutuk ho Mugabe, maibé lakon ho diferensa mínimu iha prezidensial sira iha tinan ne'ebá.

Hahú ne'e maka nia hala'o tratamentu médiku hodi manán hasoru kankru ida.

Maibé, iha Londres, analista ida ho ligasaun ba Programa Áfrika hosi Chatham House hatete katak nia fiar katak negosiasaun sira ne'ebé halo daudaunn permiti to'o ona konkluzaun ida katak Mugabe tenki husik poder.

Maibé, Knox Chityiyo admiti katak sei iha mós "espekulasaun barak" hodi garanti katak igreja katólika lokal envolve iha negosiasaun sira entre Mugabe ho militar sira.

Ba analista hosi Chatham House, objetivu hosi negosiasaun sira maka hetan rezolusaun pasífiku ida hosi krizi polítiku-militar no loke dalan ba tranzisaun konsertadu ida.

Tuir Chitiyo, militar sira aprezenta ona ba Mugabe proposta ida ba "saída dignu" ida hosi kargu. "Ha'u la hatene katak, bainhira akontese, atu nia bele ba iha ne'ebé, maibé ha'u fiar katak Mugabe nia destinu sei determina hosi nia estadu saúde", nia hakotu.

SAPO TL ho Lusa