Programa Governu Aprezenta Atraza Tanba Dadus

DILI, (TATOLI) - Ministru Prezidénsia Konsellu Ministru, Adriano Nascimento informa, programa sétimu governu ba daruak seidauk bele aprezenta ba Parlamentu Nasionál tanba governu sei elabora dadus tuir ezijénsia Deputadu sira nian.

Dadus ne’ebé governu elabora mak kona-bá implementasaun planu estratéjiku dezenvolvimentu nasionál (PEDN), dadus progresu implementasaun governu anterior  halo atinje porsentu hira no seluk tan.

“Buat hirak ne’e presiza hare dadus, presiza ko’alia mós ho diretór sira, ho entidade sira ne’ebé ezekuta programa ne’e para hetan dadus tuir ezijénsia deputadu sira, tanba ne’e mak han tempu. Ami hakás-an halibur dadus sira ne’e atu mai kompletu,” Adriano Nascimento ba jornalista sira hafoin remata enkontru ho lider bankada sira iha PN, ohin, Sesta (17/11).

Kona-bá orsamentu retifikativu nia dehan, governu aprezenta uluk Orsamentu Retifikativu hafoin programa governu ba daruak tanba konsidera OR atu atende kestaun urjénsia tolu hanesan ajustamentu ba estrutura governu foun, atu selu kompromisu ba projetu fíziku, no selu dívida.

Nune’e iha OR ne’e governu propoin US$ 200 milloens resin, atu atende kestaun ajustamentu hodi aloka ba estrutura governu foun ninian ne’ebé orsamentu ne’e US$ 300 mill resin, halo ajustamentu alokasaun osan atu selu kompromisu ba projetu fíziku ne’ebé emprezáriu sira halo ona no molok tinan fiskál ne’e remata governu tenke selu, no atu selu dívida.

Bainhira tinan fiskál ne’e remata mak governu sidauk selu emprezáriu 100 resin ne’ebé halo ona nia obra entaun governu sei hetan multa, nune’e mós konaba dívida ne’ebé balun mai husi tinan 2015, ospitál ninian ne’ebé ema lakohi entende ona pasiente ne’ebé mai husi Timor tanba sidauk selu, agora depende deputadu sira, buat ne’e urjente ka lae, sira balun dehan la urjente. Desizaun ikus OR iha plenária atu fó apresiasaun, sei opozisaun sira vota kontra ne’e sira nia direitu maibé povu hare, governu hala’o de’it nia devér.

Jornalista: Julia Chatarina | Editór: Manuel Pinto

Foto: Ministru Prezidénsia Konsellu Ministru Adriano do Nascimento. Foto TATOLI