DILI,
(TATOLI) - Forum Demokrátiku Nasionál konsidera konstituisaun mak define no
hametin valor demokrátiku ba estadu direitu Timor-leste tanba ne’e hotu-hotu
tenke kumpre atu buka solusaun adekuadu ba instabilidade polítika atuál.
Liuhosi
komunikadu Imprensa ne’ebé mak ajénsia tatoli asesu hosi mídia centre Aliansa
Maioria Parlamentár, foin lalais ne’e forum demokrátiku nasionál husu ba
Prezidente da Repúblika, Francisco Guterres Lú Olo atu tuir nia kompeténsia
konstituisaun RDTL artigu 74 no artigu 77 no 3, atu halo esforsu hodi hetan
governu ida, respeita nafatin konstituisaun, sei tulun asegura funsionamentu
governu ida estavel hodi nune’e garante dezenvolvimentu sósiu ekonomia
Timor-leste nian.
Husu
mós atu Prezidente repúblika, hametin liu tan órgaun soberanu hotu-hotu no
sidadaun hotu-hotu tenke respeitu ba konstituisaun, liu-liu Prezidente da
Repúblika ne’ebé jura ona kumpre de’it konstituisaun.
Hato’o
ba Prezidente da Repúblika iha kbiit nu’udar komandante supremu forsa armada
(numiro 2 artigo 74 konstituisaun RDTL), atu kaer metin neutralidade no
apartidarismu FALINTIL-FDTL no forsa seguransa sira iha aktual situasaun
impasse governasaun, hodi nune’e permite órgaun soberanu ida-idak kumpre sira
nia kompeténsia ne’ebé hatuur ona iha konstituisaun.
Forum
Demokrátiku Nasionál (FDN) kompostu hosi partidu sira hanesan,
Partidu Unidade Dezenvolvimentu Demokrátiku, PUDD, UDT, PSD, PR, FM, BUP,
PST, PDN, PDC. Partidu sira ne’e la hetan asentu iha Parlamentár 2017 tanba la
liu barreira eleisaun nian, maibé sira hotu nia votu hamutuk, 60.124.
Entretantu
Artigu 74. (Definisaun) 1) Prezidente-Repúblika maka Xefe-Estadu, símbolu no
garantia independénsia nasionál no unidade Estadu nian, no instituisaun
demokrátika sira-nia funsionamentu regulár. 2) Prezidente-Repúblika maka
Komandante A’asliu Forsas Armadas nian.
Artigu
77. (Simu knaar no juramentu), No 3, Iha atu-ofisiál investidura, Prezidente-Repúblika
sei halo juramentu tuirmai ne’e: “Ha’u jura ba Maromak, ba Povu no ba ha’u-nia
onra katak ha’u sei halo tuir loloos knaar ne’ebé ha’u simu, halo tuir no
haruka halo tuir Lei-Inan no lei-oan sira no fó ha’u-nia kbiit no kapasidade
tomak atu tuba-netik no hametin ukun an rasik no unidade nasaun nian.”
Jornalisita:
Zezito Silva | Editór: Manuel Pinto
Foto
Espesial
Sem comentários:
Enviar um comentário