sexta-feira, 15 de dezembro de 2017

Sente La Seguru, PPN Adia Debate OR

DILI, (TATOLI) – Prezidente Parlamentu Nasionál (PPN) Aniceto Guterres deside adia diskusaun jeneralidade Orsamentu Retifikativu (OR)  Ohin, no Aban (14-15/12) tanba preokupa ho kestaun seguransa ne’ebe ladún kontroladu.

“Ha’u hakarak justifika razaun adiamentu diskusaun orsamentu retifikaativu katak situasaun seguransa rai laran ne’ebé liga ba situasaun polítika iha parlamentu nasionál (PN) katak ema estrañu sira tama sai maibé ladún  iha kontrolu di’ak hosi seguransa, ha’u iha faktu no informasaun konkretu tanba ne’e ha’u hakarak  koordena di’ak ho seguransa nia atu bele fó seguransa másimu ba diskusaun orsamentu retifikativu iha Segunda, 18 Dezembru,” Aniceto Guterres informa ba ba jornalista sira iha Parlamentu Nasionál, Kinta (14/12).

Aleinde de seguransa interna iha parlamentu la seguru, Aniceto mós konsidera statementu Ministru Defeza no Seguransa, Agostinho Sequeira Somoctho, Mayor Jenerál, Lere Anan Timur ne’ebé mak fó sai iha mídia katak iha kilat ilegál iha Timor-Leste, ho ida ne’e presiza halo koordenasaun servisu atu bele iha seguransa ba deputadu sira iha ámbitu diskusaun jeneralidade OR.


“Ha’u akompaña tuituir ema estrañu tama sai hodi halo movimentasaun iha Parlamentu Nasionál (PN), ami rona mós informasaun barak hosi intelijénsia nian, entaun ha’u hakarak iha koordenasaun di’ak ho autoridade seguransa sira atu asegura debate orsamentu retifikativu liuliu seguransa ba deputadu sira nian.”

Antesipasaun ba seguransa sai prioridade ba PPN Aniceto tanba referénsia ne’ebé hatudu antes ne’e debate programa governu hafoin votasaun ba mosaun rejeisaun mosu kedan insidente balun iha PN momentu ne’e. maski antes ne’e iha orientasaun ba seguransa PN atu halo check point ba ema ne’ebé tama partisipa diskusaun iha PN.

Iha segunda feira mai ba debate jeneralidade OR mós sei aplika nafatin check point ho objetivu evita akontesimentu eh konfrontasaun ruma iha parlamentu hodi prejudika seguransa deputadu sira nian.

Iha fatin hanesan Prezidente Bankada CNRT, Arão Noé konsidera situasaun to’o agora normál maibé iha mak presaun polítika.

Nune’e mós Prezidente Bankada Khunto, Luis Roberto husu ba PPN, Aniceto Guterres atu labele hata’uk povu tanba durante ne’e estabilidade la’o di’ak hela, enkuantu OR liu eh lae depende ba desizaun finál iha Plenária PN.

Jornalista: Zezito Silva | Editór: Manuel Pinto

Imagen: Prezidente Parlamentu Nasionál, Aniceto Longuinhos Guterres Lopez. Imajen Mídia Palásiu PR.

Sem comentários: