Abilio Lima Tama Ona Prizaun Becora, Tinan 3

DILI - Eis Sekretariu Estadu Meiu Ambiente Abilio de Deus de Jesus Lima, tama ona Prizaun Becora, no desizaun husi Tribunal Rekursu nian, aplika prizaun tinan 3 ba kondenadu nee.

Krime neebe antes nee akuza ba kondenadu maka krime pekulatu iha artigu 295 kodigu penal, no krime korupsaun activa iha artigu 294 kodigu penal.

Tuir fontes konfirmadus husi tribunal rekursu katak, Antes nee, iha desizaun primera instansia, tribunal aplika prizaun tinan 5, no selu indimizasaun ba estadu ho montante U$ 5.300 ba estadu.

Fontes konfirmadus nee relata, iha desizaun final, tribunal absolve arguidu Abilio husi krime neebe antes nee imputa ba nia. No kondena fali arguidu ho krime abuso de poder iha artigu 297 kodigu penal, no hetan pena prizaun tinan 3, konaba indimizasaun sei halo konfirmasaun.

Desizaun neebe foti bazeia ba juis koletivu, no prosesu NUC. 2778/PDD/2011, desizaun nee tun iha loron 20 fulan Novembru tinan 2017.

Iha fatin ketak, Diretor Prizaun Becora Joao Domingos katak, Abilio Lima tama ona iha prizaun Becora, iha loron 15/01/2018 prosesu hotu ona, hein atu aloka deit ba fatin.

“Abilio Lima hanesan sidadaun ida rekonese katak, ohin loron nia tama ona, ho mandadu kondusaun husi tribunal, ofisiais sira simu ohin dadersan tuku 9:00, nia tama ho kondisaun diak, agora prosesu remata ona hein atu koloka deit ba fatin neebe merese nia hela ba,” dehan Joao.

Relata tan, prosesu nee laos ba deit kondenadu Abilio, maibe sidadaun neebe hetan desizaun husi tribunal, tenki kumpri ordem, depois tama iha prizaun hodi tuir programa reinsersaun neebe fornese husi servisu prizional sira. 

Terezinha De Deus | Suara Timor Lorosae