DILI, (TATOLI) - Autoridade
Aduaneira (AA) prepara hela protokolu ida ho Banku Nasionál Ultramarinu (BNU)
hodi estabelese pagamentu online ba taxa ne’ebé mak durante ne’e Alfándega
kobra hosi importadór no esportadór sira ne’ebé hela iha estranjeiru nó mós iha
nasaun laran.
Liuhusi komunikadu iha Portál
Ministériu Planu no Finansa ne’ebé TATOLI asesu, Diretór Jerál AA, José António
Fátima Abílio, hatete Autoridade Aduaneira (AA) liuhusi Reforma Fiskál diskute
hela protokolu ho BNU hodi fasilita importadór no esportadór sira ba pagamentu
taxa alfándega nian liuhusi sistema online.
“Sistema ASYCUDA World ne’e rasik
mós iha vantajen boot hodi halo interligasaun ho sistema banku nian para bele
hala’o pagamentu online atu asegura nia seguransa, kontabilidade no
transparénsia nomós tenke prienxe rekizitu tuir lei jestaun finansa públika
nian”, refere komunikadu.
“Maski durante ne’e iha duni
pagamentu liuhusi broker ou despaxante bainhira sira prosesu dokumentu
importasaun no esportasaun hodi prodús DAU (Deklarasaun Aduaneira Únika) hotu
tiha, sira bá selu direitamente iha Banku. Pagamentu manuál di’ak, maibé iha
risku, la seguru no dalaruma broker sira atu bá selu taxa nia bixa naruk, tenke
hein no demora ba prosesu dezalfándegamentu”.
Abílio esplika fasil no prátiku
liu bainhira uza pagamentu online, importadór no esportadór sira bele halo
pagamentu iha ne’ebé deit, bele iha rai-laran ou iha estranjeiru. Sistema
pagamentu online ne’e, depende fali ona ba BNU nia sistema iha banku
prontu ona atu hala’o ida ne’e ka lae. Sistema ne’e prátiku liu tanba bainhira
importadór ka esportadór konfirma ona no haruka nia fatura pagamentu ba
despaxante, nia lori ba aprezenta iha Alfándega Portu ho DAU 23 entaun Portu
bele liberta ona sira-nia merkadoria iha kontentór.
“Sesaun kontabilidade ne’ebé loron-loron
iha fim do dia sempre halo rekonsiliasaun ba pagamentu sira rejistadu
iha sistema ASYCUDA World ho sistema banku nian hodi haree númeru sira ne’e han
malu ka lae, tuir númeru konta bankária ne’ebé Diresaun Jerál Tezouru loke ba
Autoridade Aduaneira hodi halo nia pagamentu tuir kategoria taxa ida-idak
nian”.
Vantajen pagamentu online ne’e
mak nia bele uza de’it credit card ou master card hodi halo pagamentu
iha banku ne’ebé de’it tanba sistema eletróniku oras ida ne’e avansadu no
sofistikadu tebes, no sistema ne’e automátiku no fasil atu halo rekonsiliasaun
ho AA nia sistema iha sesaun kontabilidade hodi haree kontentór ida ne’ebé mak
na’in selu ona hodi bele hetan autorizasaun ba libertasaun tuir pagamentu ba
kontentór refere.
Jornalista: Maria Auxiliadora | Editór:
Manuel Pinto
Imajen: Diretór Jerál AA, José
António Fátima Abílio. Foto/MPF.
Sem comentários:
Enviar um comentário