DILI, (TATOLI) – Lider
Partidu Polítiku (ParPol) hosi Frente Revolusionária Timor-Leste Independente
(FRETILIN), Marí Alkatiri, hatete ninia parte halo rekursu ba rezultadu
Eleisaun Antesipada, tanba haree irregularidade la’ós manipulasaun.
Partidu ne’e halo rekursu ba rezultadu
ne’ebé akontese iha munisípiu Ermera, Maliana, Manufahi no Oekusi.
“Ami dehan akontese
irregularidade maibé la dehan manipulasaun, tanba votu aumentu hosi 50 to’o 100
iha kada urna iha munisípiu sira ne’ebé refere. Ida ne’e maka halo tasa
partisipasaun ne’e sa’e liu pursentu 80”, Sekretáriu Jerál FRETILIN, Marí
Alkatiri, ba jornalista sira liuhusi konferénsia imprensa ne’ebé hala’o iha
sede Komité Sentrál FRETILIN (CCF-sigla portugés) Komoro, sesta ne’e.
Marí haktuir rekursu ne’e
aprejenta ho objetivu husu TR halo rekontajen buletin votu iha munisípiu sira
ne’ebé temi, katak votu ne’ebé aumenta ne’e mai hosi ne’ebé no ba apoia partidu
ida ne’ebé.
“Ami ko’alia bazea ba ata ne’ebé
temi katak iha aumentu votu liu 100 iha kada urna. Se kada urna iha Timor laran
tomak akontese hanesan ne’e hotu, ne’e hira ona”, kestiona.
Ulun boot partidu FRETILIN ne’e
hatutan natureza Estadu Direitu Demokrátiku no sistema eleitorál, TR maka dalan
ikus no sei laiha ona rekursu.
“Biar nune’e la signifika
FRETILIN konkorda ho argumentu Tribunál. FRETILIN simu desizaun ne’e, tanba
laiha ona dalan atu halo rekursu no la konsidera rezultadu eleisaun ida ne’e
lejítimu”, akresenta.
Iha loron 23 fulan-maiu 2018, TR
deside katak argumentu sira ne’ebé aprezenta hosi FRETILIN la justifika atu
instrui orgaun relevante atu halo tuir FRETILIN nia rekerimentu para halo
rekontajen ba rezultadu sufrájiu.
Jornalista: Xisto Freitas | Editora:
Rita Almeida
Imajen: Sekretáriu Jerál
FRETILIN, Marí Alkatiri, ho kuadru sira seluk, bainhira hasoru malu ho
jornalista sira iha sede Komité Sentrál FRETILIN (CCF-sigla portugés) Komoro,
sesta ne'e, hodi hatan ba desizaun Tribunál Rekursu kona-ba partidu ne'e ninia
rekursu hasoru rezultadu eleisaun antesipada foin lalais ne'e. Foto Xisto
Freitas
Sem comentários:
Enviar um comentário