Lejislatura dalima hosi
Parlamentu Nasional timoroan karik sei hahú entre loron 05 no 07 fulan-Juñu, ho
tomada pose ba deputadu eleitu na'in 65 iha lejislativu antesipadu loron 12
Maiu, hatete hosi fonte parlamentar.
Ne'e hanesan loron sira provável
liu hodi hala'o sesaun inaugural hosi Parlamentu ne'ebé hetan hosi eleisaun
ne'ebé nia rezultadu karik sei valida hosi Tribunal Rekursu, iha desizaun ida
ne'ebé sei hala'o de'it hafoin publika iha Jornal Repúblika.
Kalendáriu eleitoral ne'ebé,
agora daudaun, kumpri hela, ho Tribunal Rekursu fó sai ona desizaun iha
loron-kuarta ne'e kona-ba rekursu ida hosi Fretilin (Frente Revolucionária do
Timor-Leste Independente), ne'ebé konsidera hanesan laiha lójika no hahú iha
loron-kinta ne'e analiza informasaun sira hosi apuramentu nasional, remete hosi
Komisaun Nasional ba Eleisaun (CNE).
"Kalendáriu kalkula katak
Tribunal iha oras 72 nia laran hodi analiza rezultadu sira. Ami sei tenta
hakotu prosesu to'o findesemaan ne'e no, ikusmai, komunika ami nia desizaun
to'o loron-segunda", konfirma hosi Deolindo dos Santos, prezidente hosi
Tribunal Rekursu, iha deklarasaun sira ba Lusa.
Bainhira publika rezolusaun hosi
desizaun Rekursu nian, iha parte seluk sei loke odamatan hodi fó pose ba
deputadu sira, no iha parte seluk ba Prezidente timoroan, Francisco Guterres
Lu-Olo, bolu líder sira hosi partidu sira ho reprezentasaun parlamentar.
Iha Parlamentu foun sei iha
Aliansa Mudansa ba Progresu (AMP), ho fatin 34, Fretilin ho fatin 23, Partidu
Demokrátiku (PD) ho fatin lima, no Frente Dezenvolvimentu Demokrátiku (FDD) ho
fatin tolu.
Líder AMP nian, Xanana Gusmão,
hatete ona ba Lusa katak bainhira koligasaun AMP manán eleisaun, nia rasik maka
sei xefia ezekutivu, pelumenus iha faze dahuluk.
Prosesu harii Governu karik sei
halo lalais, haktuir hosi fonte AMP nian.
Kona-ba deputadu sira, prezidente
hosi atual Parlamentu Nasional, Aniceto Guterres Lopes, maka konvoka reuniaun
dahuluk hosi lejislatura foun ne'ebé, hanesan akontese iha pasadu, sei akontese
hanesan baibain iha loron 15 hafoin validasaun hosi rezultadu sira eleisaun
nian ne'ebé sei halo hosi Tribunal Rekursu.
Prazu habitual ne'e, defini iha
rejimentu parlamentar, "aumenta" ona iha tinan liubá tanba
negosiasaun sira ne'ebé hala'o hela hodi harii Governu, no sesaun dahuluk
akontese iha loron 05 Setembru, liu fulan ida hafoin validasaun hosi rezultadu
sira.
Deputadu atual sira sei partisipa
iha sesaun abertura hosi lejislatura foun, ne'ebé deputadu foun sira ne'ebé
eleitu sei simu pose no, hafoin ne'e, sei hili prezidente foun hosi Parlamentu
Nasional.
Rejimentu parlamentar determina
katak kandidatura sira ba kargu prezidente Parlamentu Nasional nian tenki
subskritu ho mínimu ida deputadu na'in sanuluk no máximu deputadu na'in 20 no
vensedor tenki iha maioria absoluta hosi votu sira.
Hafoin ne'e, sei hili elementu
sira seluk meza nian, liuliu visi-prezidente sira, sekretáriu ho visi-sekretáriu
sira, ne'ebé nia kandidatura tenki hetan subskrisaun hosi "mínimu deputadu
na'in ualu no máximu deputadu na'in 12, hasoru lista fexadu, kompletu ho
nominativu".
Rejimentu determina mós kriasaun
hosi "komisaun ida verifikasaun hosi pdoer sira" deputadu nian.
Lejislatura iha durasaun tinan
lima ho sesaun lejislativu haat hosi tinan ida ne'ebé, tuir rejimentu, tenki
hahú iha 15 Setembru no hotu iha loron 14 Setembru tinan tuirmai.
Iha kazu disolusaun, hanesan
akontese ona foin lalais, "Parlamentu Nasional eleitu hahú lejislatura
foun, ne'ebé nia durasaun aumenta hosi tempu nesesáriu hodi kompleta períudu
ne'ebé relasionadu ho sesaun lejislativu ne'ebé hala'o to'o loron eleisaun
nian".
Iha tinan liubá, Tribunal Rekursu
valida ona rezultadu sira eleisaun loron 22 Jullu nian iha loron 01 Agostu,
sesaun lejislativu dahuluk hosi lejislatura dahaat hahú, tuir dalan formal, iha
loron 05 Setembru ka liutiha fulan ida hafoin validasaun hosi rezultadu sira.
Governu konstitusional dahitu
simu pose iha loron 15 Setembru.
SAPO TL ho Lusa
Sem comentários:
Enviar um comentário